Asmaa Kadry

Edition XXXVI

- by Asmaa Kadry (Photo by Kunj Parekh) المصور كنج باريخ

البدوي

بقلم أسماء قدري

طلّع البدوي الي فيك
حرّره
و سيبه على حاله
إوعى تغيّره
خليه يقول الشعر
يرسم طريقك ع الرمال
يلم خلجاته ويرحل في الخيال
ويجيب من حيث لا تدري درر
أفكار وشاردة بانتظار القنص

طلّع البدوي الي فيك
واقبله
على حالته مجنون
حاول تتخيّله
خليه يعبّر عن خبايا الكون
ويلاقي كنزك المدفون
اسمح له انه ينطلق
يصطاد م البراري فنون
يكتشف أرضه الجديدة
يصنع اليوم من رماد الأمس

طلّع البدوي الي فيك
واسمح له انه يجول
خليه يغيب في المغيب
ويواجه المجهول
ماتخافش مش هيتوه
ولا هيلاقيه الغول
خليه يجيب م الغياب حواديت
تغزل حكم
والحكمة ضالة العقول
هيعود في يوم منصور
واثق ومش مغرور
زي الأمل شايل شروق الشمس


Return to the top